أنواع الألياف العضلية والفرق بينهم واللإستشفاء العضلي

نتوكل على الله يا شباب ونتكلم حاجة تقريبا معظمنا معندوش اي خلفية بيها رغم ان المعرفة بيها هتخليك تحس بفرق كبير اوي في تمرينك وهتخليك تفهم عضلتك وتفهم هي محتاجة ايه

ناس كتير تلاقيها داخلة تقولك هو لو لعبت كذا واخدت مكمل كذا هزيد في قد ايه ؟ وهزيد كام كيلو ؟

تقوله يا عم بس بالراحة كل واحد له جسمه وكل واحد جمسه مختلف عن التاني والاستجابة عندك غير عند غيرك وعشان كده منقدرش نقولك هتزيد قد ايه ... طبعا بيفكر ويقولك يا عم دول مش فاهمين في اي حاجة لانه ميعرفش احنا نقصد ايه وانهادرة احنا هنجاوب على السؤال ده يعني ايه جسمي غير جسم غيري
الموضوع عبارة عن ما هي انواع الالياف العضلية والاستشفاء العضلي وبالله عليكم مش عاوز حد يكشملي وشه ويقولي عبيط ده ولا ايه يا عم انا هروح اخبط التمرينة دب دب دب وشكرا ارجع اضرب اكله متحرمة واريح الجثة التمن ساعات وشكرا وهبقى تور
يا عم الحج تمام بس والله مش بتتحسب كده ركز بس معايا وشوف الفرق اللي انت هتحس بيه في تمرينتك لما تعرف نوع عضلتك ايه ومحتاجة ايه وهل نوعها له علاقة بالعدات ؟ بالوزن ؟ بفترات الراحة اللي بين كل مجموعة ؟
اه ليها ماهو عشان كده بقولك شوف عضلتك انهي نوع عشان تجيب معاها من الاخر وتديها اللي هي محتاجاه بدل ما تيجي تسأل واحد يقولك جرب وشوف عضلتك هتتكيف مع ايه ,,,, لا انا هنا هجيبلك من ابو نهية , من باب وتلت يعني عشان تعرف عضلتك محتاجة ايه من غير تجارب واوفر ترينجنج وحوارات تعالى بدل من نتكلم كتير ندخل على الموضوع على طول

يجيي واحد مزعج يقولي ياكوتش ( وطبعا هو قاصد كوتش برباط مش كابتن ) يقولي انت هاتخدنا على غفلة ما تقلنا يا عم ايه اي الالياف العضلية دي يعني ايه يعني ويا ريت بالبلدي وتنزل الترجمة الله يباركلك ,,,,

بص يا بطل الالياف العضلية دي عشان تفهمها لازم تعرف ان العضلة الهيكلية تتكون من حزم عضلية وكل حزمة تتكون من الياف عضلية ويسمي سيتوبلازم الليفة العضلية الساركوبلازم وغشاء الليفة العضلية يسمي الساركوليما وتتكون الليفة العضلية من لييفات عضلية واللييفة الواحدة تتكون من قطع عضلية متجاورة والقطع العضلية تتكون من خيوط بروتينية وهي اكتين وميوسين.

بس بس بس واحدة واحدة يا عم ايه براحة انت هتلغفنا ولا ايه ايه الساركوبلازم والساركولومبو والحاجة اللي انت عمال تقولها دي ؟

حاضر هبسطهالك لو في ايدك طبق كشري وانا عاوز معلقة منك
بص يا وحش ده كان التعريف الطبي خلينا بقى في اللي تحت بير السلم بتاعنا بقى خلينا سوا نعتبر ان العضلة دي بتتكون من كذا عضلة صغير ( زوايا العضلات ) وكل زوايا متكونة من مجموعة انسجة عضلية او وكل نسيج عبارة عن مجموعة الياف كتير جنب بعض ... يعني يا بطل العضلة دي عبارة عن اليااااااااف كتييييييييييييير جنب بعض عملولك العضلة الحلوة دي يعني الالياف العضلية هي اساس العضلة وبكدة احنا حطينا ايدنا على مربط الفرس
وبص كده على الصورة دي هتجيبلك من الاخر :

تيجي بقى تقولي يا كوتش ( خلي بالك انا هارشه برده ) هو مش الالياف اللي عندي زي اللي عندك ؟

اقولك يا عم ماهي لو اللي عندي زي اللي عندك زي اللي عند جاي كتلر ما كونتش عملت الموضوع ده والله ولا كنت قرفتك معايا بص يا سيدي ربنا خلقنا احنا البني آدمين على نوعين من الألياف العضلية وهي ليها اكتر من اسم وانا هكتبها بكل اسمائها ( هعمل معاك واجب يعني )
ليفة بطيئة وليفة سريعة ....

امسك يا جدع ليفة بطيئة وليفة سريعة ازاي يا كوتش ؟ واحدة تخينة والتانية بتعمل اسبرنتات يعني ؟

ياعم خليك تقيل انا بس حبيت اشوف انت هتعمل ايه لما اكتبلك الكلام اللي موجود في كل المنتديات التانية ههههههههههه
وطلعت زي ما تخيلت بص بقى على الفرق اللي عندنا :


الأولى : الألياف العضلية الحمراء او الألياف الغامقة أو الليفة العضلية بطيئة الاستجابة
الثانية : الألياف العضلية البيضاء أو الألياف الفاتحة أو الليفة العضلية سريعة الاستجابة

نيجي للفرق بين الاتنين بقى

الأولى : الألياف العضلية الحمراء او الألياف الغامقة أو الليفة العضلية بطيئة الاستجابة

وده النوع الأول من الألياف العضلية والنوع ده أقل في القدرة والطاقة العضلية عن النوع التاني
بس قوة الاحتمال بتاعتها اعلى بكتير وبشكل ملحوظ عن النوع التاني من الألياف العضلية
وهي على فكرة تسميتها بالألياف العضلية الغامقة ليها سبب يعني لو معاليك معندكش مانع اقولهولك ...

اتفضل طبعا يا كوتش ( انا اتخنقت منه ولا كوتش ولا شكله فاهم حاجة اصلا )
بص يا سيدي هي اتسمت كده عشان هي بتخزن كمية اكسجين اكبر بكتير من النوع التاني من الألياف العضلية مش كده وبس وكمان حاجتين اسمهم الميتوكوندريا ، والميوجلوبين والخلاصة يا وحش ان التلاتة دول هم المسؤلين عن حجم العضلة يعني حدث ولا حرج يا وحش بس حجم الليفة هنا بيكون قصير مش طويلة زي النوع التاني و يا رب ملاقيش واحد بيقولي يعني اصغر ؟ في فرق شاسع بين اقصر واصغر

يعني وممكن اقولك انك تقدر تقول بصوت عالى ان ده السبب الرئيسي اللي قسم الالياف العضلية لنوعين مختلفين


واختصارا للكلام
النوع الاول ده قوته وطاقته قليلة وقدرة احتماله عالية فحت واطول



الثانية : الألياف العضلية البيضاء أو الألياف الفاتحة أو الليفة العضلية سريعة الاستجابة
بص يا سيدي الألياف العضلية سريعة الاستجابة بقى قادرة انها تديك قوة اعلى وطاقة اعلى واعلى من الألياف البطيئة الاستجابة بس بقدرة احتمال اقل بكتير من الألياف العضلية البطيئة وهوضح الفرق ده بكلام علمي حلو كده صغنن

بس بس على فكرة يا كوتش انت مش فاهم اي حاجة في اي بتنجان
اولا يا كوتش الالياف العضلية تلات انوع مش اتنين بس انا سيبتك عشان اثبت للناس جهلك

اقولك لا جيبت التايهة ياض طيب خد دي
النوع التاني من الألياف العضلية اكتر تعقيدا من النوع الاول من الالياف العضلية
والنوع التاني التعقيد اللي فيه بيظهر فإنها عبارة عن نوعين مختلفين

مش فاهم حاجة يابو الكباتن ...
ابسطهالك .......

النوع الأول ( الليفة العضلية الغامقة ) بسيطة زي ما شرحناها
النوع الثاني ( الليفة العضلية الفاتحة ) معقدة وبتنقسم الى نوعين من الألياف العضلية الفاتحة

كلام جميل وكلام معقول مقدرش اقول حاجة عنه ايه هما بقى النوعين دول يا كابتن ؟

بص يا سيدي
النوع الأول واخد رمز lla
النوع التاني واخد رمز llb

اه والله عارف ان النبي عربي بس انا بقولك كده عشان لما حد يتكلم قدامك تبقى فاهم ايه اللي بيحصل حواليك
تعالى بقى لكلامنا احنا بتاع تحت بير السلم

ان هنقول عليهم
الليفة العضلية الفاتحة أ
والليفة العضلية الفاتحة ب

وعشان مطولش عليك وتتوه مني الفرق الوحيد بين الاتنين أ و ب هو ان قدرة الليفة العضلية الفاتحة أ على الاحتمال اعلى واطول من الليفة العضلية الفاتحة ب وعموما اي نوع من الاتنين ( الالياف العضلية الفاتحة أ و ب )
لازم تكون عارف ان الاتنين اول من الليفة العضلية الأولى اللي هي الغامقة او البطيئة الاستجابة ان الليفة العضلية الفاتحة بنوعيها استجابتها لتمراين المقاومة افضل من الليفة العضلية الغامقة عشان كده تلاقي ناس كتير اوي بتتمرن وتفحت نفسه وتلاقيها اقوى فعلا بس حجمها زي ما هو ( وخلي بالك ده مش اللي انت عاوزه انت عاوز حجمك يزيد مع قوتك صح ؟ مش قولتلك هظبطك ؟ خليك تقيل بقى )
وكده اعرف اذا كنت بتتقدم بسرعة في تمارينك في فترة قصيرة او في تمارين السرعة اعرف انك النوع الثاني من الألياف العضلية

واختصار برده للكلام
النوع التاني من الألياف العضلية بنوعيه طاقته عالية وقوته اعلى بس القدرة على الاحتمال اقل من النوع الاول وبالتالي الفترة اقل

بص بقى معايا كده على الجدول الحليوة ده

نوع الليفة العضلية
سرعة التقلص وقت الوصول للطاقة القصوى
الاجهاد الليفة الغامقة
بطيئة 100 ميللي ثانية
بطيئة الليفة الفاتحة أ
سريعة 50 ميللي ثانية سريعة
الليفة الفاتحة ب
سريعة اوي
25 ميللي ثانية سريعة فحت


عااااااااااش اوي يا كوتش دلوقتي بقى انا احترت لاني ساعات بحس اني ممكن اعمل تمرينة طويلة واشيل تقيل وممكن ساعات احس اني تعبان ومقدرش اشيل في طريقة تانية اعرف بيها نوع العضلة بتاعتي بقى ؟


طيب طيب مش عاوز اطول عليك في موضوع الفرق بين النوعين عشان لسة الموضوع طويل واه طبعا في طريقة تانية تعرف بيها وهي سهلة وحلوة

بص يا بطل هنعمل التالي :





1 / هتحدد اقصى اوزن بتاعك بتلعب بيه في تمرينة عزل ولازم تكون تمرينة عزل واللي هو تقدر تعد بيه عدة واحدة بس ...

استنى بس يا كوتش يعني ايه تمرينة عزل وتمرينة مش عزل وازاي اجيب اقصى وزن ؟ اجرب يعني ؟

لااااااااااااااااااااا متوجعش قلبي في مواضيع كتير في القسم ومنهم موضوع مخصوص للدرع الدهبي عن انواع التمارين ادخل وشوفه وانت تفتهم ,
خش وإعرف تمارين العزل والتمارين المركبة " مهم جدا جدا "
واه جرب عشان تجيلك اصابة محترمة وتقعد في بيتك . مافي موضوع يابني في القسم بيعرفك ازاي تحدد اقصى وزن تقدر ترفعه

2 / هتضرب الوزن ده في 80%
3 / وتلعب بيهم بقى بالوزن الناتج اللي هو 80% من اقصى وزن تقدر ترفعه ده مجموعة وشوف هتقدر تجيب كام عدة وتعالى بقى اقولك انت النوع بتاعك ايه

* . لو عديت من 4 الى 7 عدات يبقى انت النوع التاني اللي هو الألياف الفاتحة او السريعة التقلص
* . لو عديت بيهم 10 عدات يبقى انت كده يا وحش عندك خليط من النوعين من الألياف في العضلة
* . لو عديت بيهم من 12 الى 15 عده يبقى انت النوع الأول وهو النوع الغامق او البطيئة التقلص

تمام اوي يا كابتن انا دلوقتي عرفت انا انهي نوع من الألياف العضلية بس في حاجة عاوز اقولك عليها بس خايف منك تضربني , بص من الاخر انا مش عارف برده كسبت انا ايه بعد ما عرفت نوها بقى ؟

دلوقتي يا وحش بعد ما عرفت هقولك بقى تمرن النوع بتاعك ازاي عشان تعمل التضخيم اللي انت عاوزه
بص يا وحش :
لو نوع الألياف العضلية يا وحش اللي عندك هو النوع الأول اللي هي الغامقة عشان تقدر تأثر على اكبر عدد من الألياف العضلية الموجودة في العضلة دي يبقى انت عاوز تلعب بعدات اكتر وراحة اقل بين المجموعات وده عشان الوقت المستغرق عشان توصل للاجهاد العضلي اطول والاستشفاء العضلي فيها اسرع
فلو انت عندك مشكلة في عضلة معينة مش بتزيد معاك زي بقيت عضلاتك يبقى انت محتاج تلعب عليها عدات اكتر مجمايع اكتر ( اربعة يعني مش تلاتة وتلاتين ) وفترات راحة اقل ( تلاتين ثانية ) لانها في الغالب بتكون ايه ؟ بتكون من النوع الاول من الألياف

تمام يا وكوتش بس في سؤال ؟ هو مش عدات كتير ووزن خفيف دي عشان التخسيس ؟

ياااااااااااااااااااااااااااااااااااااااااارب ارحمني ده انا غلبان , يابن الناس هو انا جيبت سيرة حاجة اسمها وزن خفيف ؟ هو انت يابني مفهمتش اي حاجة من اللي فات ؟ انت هتلعب بوزن تقيل عادي جدا بس هتزود العدات و المجاميع ولو مقدرتش تعد لحد 12 او 15 يبقى تعد لحد ما توصل انك متقدرش تعد عدة زيادة ومن الاخر ولو ما شيلتش وزن تقيل يبقى مفيش سبب العضلة تكبر عشانه

طيب يا كوتش لو انا النوع التاني بقى اعمل ايه ؟ بالفقاقة كده يبقى عدات قليلة صح ؟ بس ليه بقى كوتش ؟

اه يا واد يا فقيق عرفتها لوحدك دي ؟
اه صح لو انت بقى النوع التاني من الألياف العضلية يبقى انت كده واد من الاخر محظوظ وشغلك في الجيم هيبقى اسهل مش تريح وتروح تهوي على نفسك وتقول انا ألياف عضلية فاتحة ( هيضربوك بالدنابل ويقولوا عليك مخلول )
هتلعب بعدات متوسطة من 4 الى 8 عدات طبعا بوزن تقيل بفترات راحة من دقيقة لدقيقتين وتلات مجاميع عادي وكل ما الألياف العضلية الفاتحة عندك كترت كل ما كان حجم العضلات عندك ايه بيييييييييييييييييييييييييييس


تمام اوي يا كوتش حلو كلامك بس لو انا بقى خليط من الاتنين احسن حاجة العب 10 عدات صح ؟

لا غلط احسن حاجة انك تلعب خليط برده ازاي بقى ؟ يعني في ستايلات زي الدروب سيت ده اجمد ستايل يجيب معاك لو انت خليط وتلعب في الاخر مجموعة حرق تعد فيها 16 عدة بوزن متوسط تبقى ظبط الدنيا على الأخر وعلى فكرة السوبر ست حلو برده

تمام كده يا كابتن انا كده فهمت كل حاجة بس في حاجة بسيطة كده هو ايه الدروب سيت والسوبر ست ده يا كابتن انت نسيت تحط الترجمة بس ؟
يابني الله يهديك مش انا قولت لو انت لفيت لفة في القسم كنت عرفت
في موضوع اسمه احدث 16 تقنية في كمال الاجسام , روح شوفه وانت تعرف كل حاجة
افضل 16 تقنيه متقدمه لبناء وتعظيم القوة والكثافة العضلية

حلو اوي يا كابتن شوفته وفهمت يعني ايه بس في حاجة بقى ايه علاقة موضوع الألياف ده بالاوفر ترينينج يا كابتن والاستشفاء العضلي ؟

بص باختصار عشان كده انا طولت اوي :
لو كنت ركزت كنت فهمت صح ايه العلاقة بين الاتنين ومع ذلك بص يا سيدي

لو انت مثلا الليفة العضلية بتاعتك غامقة وانت روحت زي الوحش لعبت عليها عدات قليلة وروحت مريح دقيقة زيك زي معظم الناس وبعدين تروح تاكل وتريح ومتلاقيش جسمك زاد , طيب ماهو هيزيد ازاي وانت موصلتش العضلة للاجهاد اللازم للزيادة
وتخيل بقى انت عملت العكس والليفة العضلية عندك فاتحة تروح لاعب عليها 12 عدة في اربع مجاميع في 30 ثانية راحة تبقى فحت العضلة وردمتها وهي اصلا بتتعب بسرعة وتبقى عملت عليها اوفر ترينينح محترم وافورت عليها فوق طاقتها فهمت بقى ؟

تمام اوي اوي يا كابتن بس في نقطة عاوز اكلمك عليها انت كاتب في عنوان الموضوع الألياف العضلية والأستشفاء العضلي انا عرفت بقى الألياف واضخم ازاي تبع نوع الألياف العضلية اللي عندي بس ايه بقى موضوع الاستشفاء العضلي ده وايه يعني لو مهتمتش بيه ؟

بص يا بطل موضوع الأستشفاء العضلي اللي هو بالبلدي كده فترة الراحة اللي العضلة محتاجاها عشان تعيد عملية البناء بعد الدمار اللي انت عملتهولها في التمرين الجامد ده بص هو الموضوع اسهل مانت متخيل وانا عارف انك كل ما تدخل موضوع تلاقي واحد بيسأل بعد اذنك يابو الكباتن اكل ايه انا رايح التمرين بقى وعلى كتفي دنبلين والبار في شنطة العربية وفي ايدي الطارات اهي بس اكل ايه بقى تلاقي كلنا بنقولك كارب معقد قبل التمرين وكارب سريع بعد التمرين مع وجبة بروتين محترمة , وانت ياعيني ولا فاهم انت بتعمل كده ليه بس بتعمل زي الكباتن ما بتقول بص بقى عشان تفهم
كلمة السر كتوووووووووووووووت
يا عم لا كتكوت ايه بس اقصد جلايكوجين و اوكسجين

الجلايكوجين ده يا سيدي من الأخر هو من اهم العوامل المؤثرة في نمو العضلة

يجي واحد يقولي مع احترامي ليك يا بطل انت ولا فاهم اي حاجة لان البروتين هو اهم حاجة ....
اقولك ماهي دي المشكلة ان الكل فاهم ان انا لما اكل جاموسة يبقى انا كده خلاص بقى عندي تلاتين كيلو عضلات
ياعم افهم الله يهديك معظم لاعيبة كمال الاجسام تلاقيهم خايفين ياكلوا كارب بدون مبرر لانهم كلهم خايفين ان الكارب ده يتحول لفات او دهون وانا في رأيي حلي بالك ان ده مناقض تمام لكل اللي انت بتعمله
تلاقي كل واحد داخل يقولك اعمل ريجيم الكارب عشان تنزل دهون ياعم الحج اهدى بالله ريجيم الكارب ايه بس الله يهديك هتودي الراجل في داهية وهتعرف ليه لما تكمل قراية انت عارف ان الجلايكوجين ده هو الوقود الرئيسي للعضلة اثناء تمرين الحديد بتاعك ؟ فاهم يعني ايه الكلام ده ؟ اخبط دي , انت عارف ان لو اتمرن بوزن 65% من اقصى ثقل تقدر ترفعه وتعد بيه من 4 لــ 7 عدات ده بيخفض معدلات الجلايكوجين في العضلة بنسبة 70 % من المعدلات الطبيعية بتاعتها ؟

طيب وايه يعني ؟ ولا يهمني ,,,,,

يابني مانت لو اتمرنت بقى مجاميع كتير ومستوى الجلايكوجين عمال يقل ومعاليك مش بتاخد كارب كافي يعني الجلايكوجين اللي عندك هيخلص وده من الأخر هيأدي لانك هتخس مش هتزيد لان محفزات النمو بتاعت معاليك هتقل عن الطبيعي وخلي بالك هي المفروض تكون اعلى من الطبيعي لانك لاعب كمال اجسام

يا لهوي لا ده باين ان الحوار كبير اوي طيب كمل يا كابتن فين بقى الاستشفاء العضلي اللي انت بتقول عليه ده ؟

بص يا بطل بالنسبة للكارب اللي لازم تاكله عشان تدي للعضلة البنزين بتاعها ده هيفيدك في حاجتين :
الحاجة الأولى انت بتدي للعضلة السبب اللي تقدر تشتغل بيه في قلب التمرين من غير ما تخاف انها تحرق في بروتين العضلات والألياف العضلية عشان تقدر تكمل تمرين
والحاجة التانية انك بتتجنب الاوفر ترينينج بطريقة من طرق كتير تقدر تعرف عنها اكتر في الموضوع بتاع كابتن

المنتدى Mr. Dreamer

هرمون الكورتيزول و اضراره و التمرين الزائد OverTraining فى الجيم

ده هيديك من الأخر عن الاوفر ترينينج

الاستشفاء العضلي بقى عشان تفهم الموضوع لازم تفهم ايه اللي بيحصلك في التمرين وانت شغال عمال بتعتل
بص الاستشفاء العضلي ده عبارة عن جزئين
استشفاء لحظي ( غير كامل )
استشفاء كلي ( الاستشفاء الكامل )

الاستشفاء اللحظي ده بقى هو اللي احنا اتكلمنا عليه فوق بتاع الفرق بين المجاميع وقولنا ان الألياف الغامقة ليها وقت معين والألياف الفاتحة ليها وقت معين وكل واحد وليفته بقى ( الليفة العضلية يا عمونا )
ولو تلاحظ تلاقي انك لما تلعب مجموعة بالوزن بتاعك وتعد ومن غير ما تريح تدخل مجموعة كمان وتدخلت واحده كمان من غير ما تريح هتوصل لحاجة اسمها فيليور وهي المرحلة اللي انت فيها مش قادر ترفع تاني مع ان الوزن ده انت ممكن ترفعه عادي بس هترفع ازاي وانت كل المخازن عندك في العضلة نزلت للصفر ؟ فلما بتريح من 30 ثانية لدقيقتين بيبدأ يحصل الاستشفاء اللحظي وترجع المخازن تتملي تاني سواء فوسفات او اوكسجين وهكذا من باقي المكونات داخل العضلة

الاستشفاء الكامل بقى عشان تفهمه لازم تعرف ان زي ما قولتلك انت اثناء التمرين عموما بيبان عليك التعب لانك بتستنفذ كل الطاقة اللي موجودة عندك في قلب التمرين بعد التمرين بيبدأ جسمك يدخل في فترة استشفاء مبدأية وهي اللي انت خلاص بقى خلصت التمرين وبدأت تاخد نفسك وخرجت روحت بقى وبتظبط لأكلك وكده والفترة دي بيكون معدل الحرق فيها عالي فحت والتمثيل الغذائي بيكون سريع . بعد ما تريح بقى معاليك وتريح الجثة بيكون في حاجة اسمها الاستشفاء الكامل ودي طبعا بتاخد لها كام يوم وخلي بالك بقى من حاجة مهمة اوي انك في المرحلة دي العضلة بتزيد فيها وقدرتها وقوتها بتزيد يعني لو مخاديتش الراحة الكاملة بتعتها وحصل لها الاستشفاء الكامل ودخلت لعبتها تاني يبقى انت كده بتأفور عليها يا وحش وداخل في اوفر ترينينج محترم ,,,

العضلة الكبيرة بتاخد من 4-5 ايام علشان يحصلها استشفاء
و العضلة الصغيرة بتاخد من 2-3 ايام علشان يحصلها اسشتفاء ايضا

تماااااااام اوي يا كوتش انا كده هريح كل اسبوع اسبوع يعني هلعب اسبوع واسبوع تبقى القدرة عندي شغالة نار والحجم يزيد

يا واد يا برم طيب خد دي انت لما تريح بعد حصول الاستشفاء الكامل للعضلة بتبدأ ترجع المعدلات للعضلة الى المستويات الأولى اللي هي كانت عليه ,
تسألني وتقولي طيب وهي العضلة عارفة يا عمونا هي كانت مستوياتها ايه ؟ اصلي عارف انك ذكي
اقولك لا بس القصد ان العضلة بتبدأ المعدلات فيها تتكيف مع المجهود القليل اللي هي بقى فيه فبتقل عن مستوياتها وبالتالي ممكن ترجع الى المستوى اللي انت كنت مريحها فيه فهمت بقى ؟

بص بقى يا سيدي الحاجات الحلوة دي عشان تسرع عملية الاستشفاء العضلي
اليوجا , الساونا , الفيتامينات , الأكل بقى او التغذية السليمة اللي فيه كارب يابو الابطال , حمام الدش المتقلب ( 30 ثانية ساقع وبعدهم زيهم سخن وتكرر لحد لما تخرج ) , تشرب مياااااااااااااااااااااااااااااااااااااااااااااااا ااااااااااااااه بالعبيط
النوم 8 ساعات على الاقل بالليل عشان هرمون النمو

بص يا كابتن انا حبيتك وعاوز اجيبلك من الآخر انا ولا هدخل ساونا ولا هعمل يوجا ولا اي بتنجان ده انا بدفع تمن الجيم بالعافية هات من الآخر اكل ايه بقى ؟

بص يا وحش بالنسبة للأكل انا اتكلمت على الكارب بما فيه الكفاية فوق ولازم تاخد بالك ان الكارب ده هو اللي بيحمي البروتين اللي في العضلة عشان يتحرق مكانه
وخد الموضوع هيجيب معاك من الاخر في موضوع الكارب ده

اهمية الكربوهيدرات للاعب كمال الاجسام


ويارب ما تفهمش انك تاكل ايه دي معناها بعد التمرين على طول علشان انا لسة قايل ان فترة الاستشفاء الكاملة بتاخدلها ايام يبقى لازم تكون فاهم ان ده نظام غذائي كامل للايام اللي بعد تمرين العضلة

تاكل ايه بقى بالبلدي ؟
بروتيات بكميات عالية وتظبط بقى شوفان ولبن وبيض وفراخ وسمك والكلام اللي احنا حكينا فيه كتير ده

ايه ده يا كابتن يعني على كده الاكل اللي انتوا بتكلموا عليه دايما اصله حوار الاستشفاء العضلي ده ؟

اه طبعا امال احنا بنحكي فيه ليه ؟

يعني يا كابتن مش عشان العضلة تكبر وحجمها يبقى حلو ؟

يابني هو انت لسة مفهمتش ان الاستشفاء العضلي ده اسم تاني لكلمة نمو حجم العضلة ؟ الاتنين وجهين لعملة واحده مانا لسة قايل ...

آآآآآآآآآآآآآآآآه صحيح طيب يا كوتش ممكن سؤال اخير

اه اتفضل

عاوز جدول غذائي بقى من الاخر عشان امشي عليه لاني بعد ما عرفت نوع اللألياف العضلية بتاعتي هتدرب ازاي بس عاوز اعرف اكل ازاي بقى ,,

خد بقى يا سيدي
"" خلاصــــــة تغــــذية لاعـــــب كمـــال الاجســـــــام ""
الموضوع الشامل لأهم مواضيع تغذية وتدريب لاعبى كمال الاجسام

وكده تبقى عرفت انت عاوز ايه وتوصله ازاي وعرفت ليه مينفعش اقولك تقدر تزيد في قد ايه ؟ وتزيد قد ايه كل اجابات الاسئلة بتاعتك دلوقتي بقت في ايدك ومفتاح جسمك وعضلاتك بقى معاك وعيش يا وحش

شكراً